كلمات جميع أغاني الحقيبة السودانية

[الصديق ابراهيم دفع الله]

كلمات جميع أغاني الحقيبة
*********
حقائق حقيبة الفن
حقيبة الفن إسم راسخ في وجدان الشعب السوداني كمفهوم لأغاني حقبة معينة وثرة من تاريخ الغناء واستمرت من العقد الثاني الى بداية العقد الخامس من القرن الماضي بالسودان إمتدت مابين عام 1918 إلي أواسط الأربعينيات وفي الغالب مصدرها هو كلمة حقبة من الزمن
وإنداح الأسم ليشمل شعراء وفناني الحقيبة من رواد الفن الأوائل فأصبحنا نقول في عفوية شعراء الحقيبة أنفسهم فأرتضوا هذا الاسم ، ومن رواد الكلمه الذين اضافوا الي الاغنية السودانية الكلمة والاحساس الراقي والتعبير الجميل كثيرون ومنهم محمد بشيرعتيق 1941 - احمد حسين العمرابي - العبادي - خليل فرح1932 - عبدالله سليمان العشوق - عبدالرحمن الريح - سيد عبدالعزيز- محمد ودالرضى - ابو صلاح - احمد ابراهيم فلاح - المساح ونجد ايضا من رواد النغم ورواد غناء الحقيبة
كرومه ، عائشه الفلاتيه، اولاد توتي ، سرور ،خليل فرح ، عمر البنا ، عوض شمبات ، ابراهيم عبد الجليل التوم الفنان مبارك حسن بركات
أحاول هنا في هذا البوست أن أوثق وأجمع لجُل أغاني الحقيبة

***********************
كلمات جميع أغاني الحقيبة السودانية
ياناعس الاجفان
كلمات الشاعر محمد بشير عتيق
لحن وغناء كرومة
ياناعس الاجفان انا من صفاك مسحور
بالله انت ملاك ؟ ولا من حسان الحور
تذرف عيونى بحور اقضى الليالى قيام مابين شوق وهيام
وارعى النجوم فى سحور
وفؤادى آه منحور مقتول بغير سلاح واقول بكل صراح
سببى العيون الحور
فيك الكمال محصور اكظمت كل حسود وحسنك مقامه
يسود على كل جيل فى عصور
وطرفك لحاظه تريع اسدا شجاع وهصور
ليك نفرة الغزلان مع جبرة الفرسان فى هيبة المنصور
أهيف رشيق متبور تتهادى تيه ودلال مابين غرف وظلال
نعمة وترف وحبور
وسهمك على مهبور ايه ذنبى غير هواك انا ياجميل
بهواك من قلبى مامجبور
ياالبى العفاف مشهور
ندك عبير فياح وقوامك المياح
أينع ثمر وزهور
فى حبى دمعى جهور
انا فى دجاك ياليل نجمك بقالى خليل
فارقت نومى دهور
انا لى زمن مأسور
هجرانى ماهماك ياللى قاسى لماك
من طول جفاك محسور
وحياة خديك وجيدك وطريفك المكسور
انا شعرى مابيوفيك مهما ابالغ فيك
منظومى والمنثور

[الصديق ابراهيم دفع الله]

في الطيف
(( الشاعر عمر البنا ))
في الطيف أو في الصحيان زورني *** ياحبيبي أنا عيان
مالو لـو فـي بعـض الاحيـان **** تسمح لـي صحـوا اراك عيـان
تاخذ ياحبيبي عـن حالـي بيـان**** عسي تبقي قلوبنا في الغرام سيـان
ياالفريد في حسنك وبهجة امدرمان**** لي من شوفتك يا حبيبـي زمـان
أنا ساهر ونـوم عينـي حرمـان **** وانت بين اترابك في نعيم وامـان
النحول علي جسمي يا حبيبي بيان**** وانت جسمك نامي وبالنعيم طربان
لو رأك الناسك المـن الله جبـان **** بيك يفتن ويصبح بالغـرام تعبـان
قبل حسنك قط مارايـت انسـان **** فاق العسجد لمعة والحريـر لمسـان
كيف يحصر وصفك ياحبيبي **** لسان والبان اتعلم من قامتـك الميسـان
مالـدرر لثنـاك مابنـت الحـان **** للمـاك وايـه نفحـة الريـحـان
انت حسنك كامل لكـن لمحـان**** خدك قاسـي وقلبـك ماحـان

* * * *

[الصديق ابراهيم دفع الله]

أحرموني
(( كلمات الشاعر ود الرضي ))
احرموني ولا تحرموني
سنة الاسلام السلام
عطفكم يا من الموني
كالاشعة الاسهم رموني
الشجون بالليل نادموني
الانين والنوح علموني
لو معنعن قول كلموني
حبي طاهر لم تظلموني
برضي قابل الظلم احترام
***********
يا النفوني كفى اعرفوني
ساهي ساهر ساحات جفوني
في هواكم يا من جفوني
لا الوم ان لم تنصفوني
انعكاس الاحوال كفوني
ايضا الايام عرفوني
يوم سموما ويوما غمام
***********
كلما النسمات عطروني
فاجأوني دموع مطروني
رب اغفر للعكروني
في وداعة الباري العروني
رب وقت يتذكروني
او يقول القايل دروني
او يحدث عني المنام
***********
الدهاة بالسلو ما دهوني
عن تجاهكم ما وجهوني
بي تحكو وشمتو النهوني
وبرضي هايم وخاضع لهوني
لا اقول مستنكف دهوني
عن كثير عن قيس نبهوني
عن حقيقة الحب غين ولام
*************
ما تنفس صبح او ضحى لي
الا غاب هدهد فكري ورحالي
قال قربك عين المحال
قلبي غير زكراك ما صحى لي
يكفي ان السهد اكتحالي
يكفي شاهد لي انتحالي
شاكي شاكر شاخص دوام
**************
طاف خيالك والليل كافر
شفت بدرو المتجلي سافر
صك غاضب لقى دمعي دافر
قاللي جملة وعقد الاظافر
قاللي طبع الريم اصلو نافر
قتلو عل تريم النوافر
وعل راء الريم تبقى لام
*************
في التفكر اصبح وامسي
ايضا التزكار نجوى همسي
وحياتي اشبه برمسي
اشكو يومي واسترحم امسي
ما عهدتك يا ليل تمسي
طلت وامتى اشراق شمسي
وانت وين يا بدر التمام
*************
قتلو ليت الايام يندن
تبقى لانت وسحابا دندن
بلماك النيران يخمدن
ليك روحي واجزيك حمدا
قال لي كيف تستوجب لي حمدا
من تعاطى المكروه عمدا
غير شك يتعاطى الحرام

[الصديق ابراهيم دفع الله]

فلق الصباح
(( كلمات وغناء خليل فرح ))
*****************
فَلَق الصَباحْ قُول لىِ ** أهو نورَك لاحْ خِلَّي
يا خفيفْ الروح ** هُوَ هذا نَداكْ
أم ندى الأزهَارْ
***************
من جِنَان رضْوانْ أصلَكْ ** لذّا كلِ ربيعْ فَصْلكْ
إتْنَفَس فُوحْ ** تِتْنِنَفَس نَاسْ
ورياضْ وبحارْ
*****************
مَا ألذَّ نَسيمْ وَصْلَكْ ** ما رأيتْ يا جميلْ مِثَلكْ
يا بَليِلْ السُ وحْ ** هُوَ هذّا هَوَاكْ
أم هوى الأسْحَارْ
****************
إنتَ روضَهْ وليَك زَهَرهْ **وَلّهْ كوكبْ وليكْ بُهْرهْ
ضَمخَوكْ للجبير *** زعفَرانْ وعبيرْ
إنْتَ نَار في بُهارْ
***************
صَبَغْ الخدَين حُمْرَه ** بعد ساعة بَشُوفْ صُفْرَهْ
الإصْفِرارْ دَهْ كتير ** أخجلوَك يا أميْر
وَلَّه نُمتَ نِهارْ
******************
صِبِحْ البُستاَن شايِلْ**شَجَرْ الرُمَّان مايلْ
السُلاَفْ في الدَنَانْ ** والكنارْ في حَنَانْ
والهَزَار ي هِزَارْ
إنتَ كالطاووسْ خائِل ** كبرياءَك وفيك خايلْ (2)
انزل إنْتَ كمانْ ** غَنَّ قول يا زمانْ
ويَنْ حبيبي آذار
ما عِرفْنَا عِدوكْ ذَاهِل ** وَلَّهْ لِسَّهْ غُلاْم جَاهِلْ
مُتهَلِكْ صَيف ** شِتَا عِندكْ كيَفْ
في اللَّعِب بالنارْ
************
في لِهيَبكْ أشوفْ ساحِلْ ** كالفَراشَهْ أجيكْ راحِلْ
أنا خايِفْ كيفْ ** يالَطِيفْ الطيَفْ
أهَوى وأبْقى في نارْ

[الصديق ابراهيم دفع الله]

قسم بي محيك البدري
الشاعر / أبو صلاح
قسم بي محيك البدري
غرامك منه ضاق صدري
حبيبي بي العلي تدري
***
المَحَي نور ليلة القدر
نصب قوس حاجبه لي غدري
و معاك في داخل ألخدري
فؤادي المالكة من بدري
***
حياتي ونعمتي ويسري
رضيت لو يرضي بي أسري
وفرض يا دموعي تنتثري
إذا منه النسيم يسري
***
حمام الأيك والقمري
يصيح ينبيك عن أمري
وبين عوا سلك السمري
روا يحي وفاكهتي وخمري
***
أراك وتوفي بي نذري
دموعي ألفي الوجن تزري
حنانك ما عليك وزري
أنا قاسيت الهوى العذري
***
صحيح لجروحي لا تبري
هواك برضاي ما جبري
وبسيمات فاهك ألتبري
يا جميل كم قللت صبري

[الصديق ابراهيم دفع الله]

زهرة الروض
الشاعر عمر البنا
لحن وغناء كرومة
يا زهرة الروض الظليل
جانى طيبك مع النسيم العليل
زاد وجدى نوم عينى اصبح قليل
يا زهرة طيبك جانى ليل
اقلق راحتى وحار بى الدليل
امتى اراك مع الخليل
واجلس امامكم خاضع ذليل
دايما انوح واقول حليل
صفى القلب القدره جليل
كيف لا اسهر واكون عليل
انا فى الثرى وهو فى الاكليل
يا الليك عفافك دايما زميل
يا المن طيبك طيب زهر الخميل
لو مر نسيمك على الف ميل
يخلى العالم طربا ثميل
يا اهيف يا ذا الطرف الكحيل
يا الصدرك عالى وخصرك نحيل
مناى فى الدنيا قبل الرحيل
ارى شخصك لكن مستحيل
يا زهرة روضك يبعد عن الـ
عاشق ومحال للقاك ينيل
بستانك نضير ساقيه نيل
الحياة ومحصن بالدردنيل
امتى تعود ايامى القبيل
يا حبيب واوجد للقاك سبيل
ومعاك اتحادث فى قبيل
شفاء داء قلبى الوبيل
قال لى صحيح جسمك هزيل
وجمر الغرام فى عضاك نزيل
لو ما بخاف عاذلى الرذيل
لكنت اوصلك ولعياك ازيل

[الصديق ابراهيم دفع الله]

أنة المجروح
كلمات : سيد عبد العزيز
الحان : الحاج محمد أحمد سرور
يا أنة المجروح يا الروح حياتي تروح
الحب فيك يا جميل معني الجمال مشروح
للحب لهيب فى الجوف زيو الزناد مقدوح
منه الجبابرة تلين لصوت بلابل الدوح
تصاحبو النسمات تفضل معاها تدوح
من نغمة الأشواق ومحاسن الممدوح
الناس تحب رؤياك بالخاطر المشروح
يا ملفت الأنظار يابسمة المفروح
حوريه فى السودان بحبى ليكى أبوح
عنب جناين النيل أتمنى منه صبوح
وانشد فؤادى الضال بين الرياض مذبوح
أرى الهلال فى ظلال تلك الخميلة يلوح
أنا لو ضمنتو رضاك اكون سعيد ممنوح
يا من تسر رؤياك تفرح تنسى النوح
تكسو النهار بجمال خديك جمال ووضوح
منو الغزالة تقف فى موقف المفضوح
من الوله للقاك دمعى العزيز مسفوح
ناقم على الأيام مع أنه طبعى صفوح
انا والخيال فى جدال وانت بنداك منفوح

* * * *

[الصديق ابراهيم دفع الله]

نسايم الليل
الشاعر / عمر البنا
نسايم الليل زيدينى
بالشذى والطيب عودينى
زاد الشوق لى يهون امتى وصاله
يا نسايم الليل آنسينى
فى رجوعك لا تنسينى
بى طيب الحب آسينى
من بعد الضر ماسينى
انا برضى عشوق مهما جيوش الحب صالوا
يا نسايم ما بترعينى
ما بفيدنى شذاك دعينى
لو قصدك لى تعينى
ارجعى بى دمعة عينى
للمعشوق قوليلى ينوح ونومه عصالو
فى الهوى يذداد تمكينى
يا بلابل الدوح حاكينى
فى نواحى دوام شاركينى
فى الحب ابكيك وابكينى
اصيح مفروق لى بروق ثغرك لالو
طيفك لامتى يجينى
وفى لذيذ النوم يناجينى
من سهم البين ينجينى
ويبرد نار سجينى
وفؤادى يروق واناجى ملاك طيبه خصاله
سلامى بعد تجنينى
عليك وليالى سنينى
بعد شعرى وتفنينى
فى وصفك وعد حنينى
يغشاك مرفوق مع النسام وروحى خلاله

* * *

[الصديق ابراهيم دفع الله]

أفكر فيه و اتأمل
الشاعر عبيد عبدالرحمن
آداء سرور
افكر فيه واتامل *** اراه اتجلى واتجمل
هلالى الهل واتكمل
تفاصيل قولى والمجمل*** ساصبر ياأخى ايه اعمل
اذا قلب الفتى اتحمل***مصايب الدهر والامه
ارى الصبر الجميل اجمل
حديثى ودمعى يتسلسل***فصول فى رواية تتمثل
اقيف فى مواقف استبسل***وعن رؤيا الحبيب حالا
ابين فى مناظر اتوسل
هواه بجسمى يتخلل***مجارى الدم الدم اذا اتحلل
وقيع لى رضاه اتذلل***وما هماه يا سيدى
دا واحدا اصله بيتدلل
ترك افكارى تتضلل***بعذره البيه يتعلل
فما شرع الهوى حلل***لقان نهار ولا
فى ليل اذا أليل
صريح قانون هواك خول***هلاكى وقلبى ما اتحول
حقيقة وليس تتأول***صريع لحظات سيوف لحظك
وحالى ان شفته تتهول
تذكر عهدنا الاول***صحى الايام بتدول
قريب يوم داك ما طول***مضت ايام ويا حليلن
بقت احلام وتتأول

[الصديق ابراهيم دفع الله]

اغنية مرضان باكى فاقد
الشاعر محمد على عثمان بدرى
مرضان باكي فاقد......فيكى علاج طبيبي
قالوا ترك سكونك .....يادار وين حبيبك
******
يادار من بقاياك...فوحي وجيبي طيبي
أو عاتق شميم ......النرجس من رطيبي
ماردت سؤالي.......وأجابت دار حبيبي
سدت حلقي عبره.....نفسي متين تطيبي
******
أنا لي مدة طالت .......ما شاهدت قمري
ما شاهدت غصن .....اليانع فيه ثمري
أنا ماشفت محبوبى.......البفيداه عمري
اسكر من عيونه ....هي كأسات فيها خمري
******

حبي الغير خافي.....ياالانت بتخبرى
اسألي منه قلبك......ومن نيراني تبرى
مروا على ناسك....وليك شالوه خبري
هل عرفوني حائر.....وهل ادوك خبرى
******
كيف طغى لي حبك....دائي متين تزولي
لولاك ما نزلت .....عن مقدار نزولي
ليك بنثر جواهري...... وبلغيها زولي
قالت كترت عليه......صديقي الما عزولى
******
فاكهه جميلة يانعه.....شتاها طاف بدري
دره يتيمة انسه.....ظبيه حواها خدري
حوره فى نعيمه......طواها جبينها بدرى
انا فى ناره ساهر....باكى أريتها تدرى
******
لو كلمتي طيفك .......قلت يزور ضريحي
أو قلتيلو داوى.......علل عاشقي وجريحي
لا باس من عذابي.....وبكاء جفني القريحى
ما دام انت نائمه....... وهادئه وتستريحي
******
أنا غافل غرامك.......دون اعلم شحني
دمعي إذا طريتك....بين الناس فضحنى
أنا شاعر فؤادك....في الحب امتحنى
برضك جافيه نافره ....لي متين تحنى

[الصديق ابراهيم دفع الله]

خمرة هواك يامى صافيه وجليه
الشاعر / احمد حسين العمرابى
خمرة هواك يا مي صافية وجلية.....هي اللاعبة بالألباب لا البابلية
كم ليل أنوح سهران والناس خليه......عيني سهاد ودموع أمست مليه
شاهدي اضطراب ونحول ظاهر علىّ....راضى وبشوف هجرك اكبر بليه
مي الفؤاد بهواك فاقد شليه......لو طال جفاك يضيع باقي التليه
يا تائهه سيبى الجور حلمك علىّ.....ليك منى ما شئت والوجد ليّه
أنا لم أزل لهفان وانت الابيه....... سنيتي أن تحيي دائما خبيه
لو فى النساء رسل كنت النبيه......مابسلي ريدك لا وحياة ابيه
هاك منى بإخلاص الماسه ديه......دررا تنافس الدر وأزهار نديه
هلم روحي إليك يا مي هديه .....كان النبي المعصوم قبل الهديه
ليك منى الف سلام والفيى تحيه......تصباك مع النسام بروح سحيه
ما قال محب وعلى محبوبه حيا.........وتقر عيونك يا نور المحيا

[الصديق ابراهيم دفع الله]

من الاسكلة وحلا قام من البلد ولى
الشاعر / ود الرضى
دمعى اللى الثياب بلا
من الاسكلا وحلّ......قام من البلد ولّى
دمعي للثياب بلّ
********
بى داهى العذاب حلّ....وبى تذكاره بتسلى
قلبي الذاب واختلّ.....وين بدر التمام هلّ
*******
صفر ودع الوابور......حاجزين قمره أتنين دور
الوابور مرّ بالمجرور....شال ظبيا سكونو خدور
*********
جبل أوليا حبيبي غشا.....وحصل في القطينة عشا
يا قلبي الطفش وفشا.......الما آليته......... ينكفشا
********
حل زى الصقر خوى......بالبدر الدويم ضوّى
عاد لا حوله لا قوّه......حبيبي الليله في الكوه
*******
صباح الخير على ام نفلين.......أهني البيها محتفلين
سيد الحسن رب اللين.......شرف كوستى والجبلين
********
هنيئا حان وقت زهاك.........الرنك احتفل ببهاك
وين الليله يا النشهاك......يا ليت كنت في جلهاك
********
يا كاكا الحبيب طلاك......بعده الزاد نفوسنا هلاك
يا ملوط حليل نزلاك........يازمن الفراق نسلاك
*********
بقدومك كدوك أصبح.......سوقو من الكساد ارباح
انا من نياحى صرت ابح........كأنى فى مبرك المذباح
**********
زاد من بعدك الانكال......قلبى البالهموم..... انكال
شاطري العاصمه يا ملكال.....توفيقيه صبرى انا كال
*********
شامبى أضحى بيك مسرور.....بعد المنقلا يا سرور
يا جوبا حي أنا المضرور....بعده النوم بقى لي ضرور
************
من دا الهم ما بنجى.........حبيبي الليله في تونجا
يا خالق الخلق تنجا.......تركاكا..... حلت العنجا
********
سلام متنامى ما غبّ.....ما مرّ النسيم صبّ
يرضى ال للعفاف ربى....ويخدم كامل الرتبا
*********
صب يا دمعي لا تكون جاف......وياقلبى البقيت رجاف
البدر الخفا....... الانجاف..اليوم شرف الرجاف

[الصديق ابراهيم دفع الله]

قلبى هام مالو...
الشاعر / ابوصلاح
قلبى هام مالو....اه خديدك وجمالو
معذب فى هواك مالو
بدر حسنك لاح والقلوب مالو
لي هواك وشوق قلبي عمالو
يا فريع ياسمين متكي في رمالو
قول لي عاشقك وين ضاعت امالو
*************
شعرو حاكي الغيم حاجبو هلالو ..
فر بسمو نغيم والبروق لالو ..
مافي مانع لو قتلي حلالو ..
افدي جوز تفاح صدرو لولالو
*********
الجوهر الفردي ما اتلقى مثالو ..
قلبي ليهو يلين وقلبو يقسالو ..
حبو صابحني و حسنو مسّالو ..
غير وسيم خدو دموعي ما سالو
الشادن المكحول قلبي يصبالو ..
واخشى من لحظو ومن رمي نبالو ..
كم جريح بي سهام عينو ضاربالو ..
و بيها لا يدري ولا على بالو..
***********
خصرو ناحل وزاد جسمي إنحالو ..
طرفو ناعس نام وطرفي يصحالو
الفريع السيل دمعي سحالو ..
يا نسيم ارجوك شوفو كيف حالو ..
******
شوف لحاظو سيوف حاجبو هدالو ..
حرسو حولوا يدور إستعدالو ..
الخديد يلصف حسنو يندالو ..
البدر لو غاب يضوي في بدالو
* * * *

[الصديق ابراهيم دفع الله]

الشاغلين فؤادى
الشاعر / علي المساح
الشاغلين فؤادي وتايهين فايقين
يفتى البى ذارف دمع المايقين
*******
تال القبلة شايف لي برقا لمع
والصيد في الخما يل ياناس اجتمع
قوموا يا أحبة نسترق السمع
ما يطيق القعدة والمايق دمع
*********
البلابل صاحت في الليل الهجيع
سهرانات عيوني وجافيت الضجيع
من الحاله ديه اولا لي النجيع
وا حسرة شبابي الما لقيت لي وجيع
******
كلف احبابى لي يا مولاي قدروا
انسلبت لحومي واعضائى خدرو
لاموني العوازل بى حالي ازدروا
هم تايهين دلالن ساهين ما دروا
********
سامرت الكواكب لما الفجر لاح
منادى الفجر نادى وقال ياهل الصلاح
صلوا الوقت حاضر قام أهل الصلاح
وانا الليل قايمو لا خيال لي راح
******
النسيم عاودني أقوم من نومي تاب
مدهوش فكرى حاير مشطوب انشطاب
يا نسيم بلاهى جيب رد الخطاب
اوع الجاهلة نية وما بتحمل عتاب
*******
حليل القدرو سامي فوق الجيل فريد
حليل روحي بقت ليه طوق في الوريد
بكتب ليه خطابي وعذري عذر مريد
يا نسيم بلاهي طبق ليه البريد
***********
انكسرت اعضائى من كسرة الولوع
وابكي العبره خانقه وانا ليها البلوع
أصبح قلبي يرجف خلى من الخلوع
يا ناس روحي شاهقة هيه ناوية الطلوع

[الصديق ابراهيم دفع الله]

عيونى وعيونك
الشاعر / احمد ابراهيم فلاح
عيوني وعيونك أسباب لوعتي
أسباب تشوقي نظرتك وأسباب نفورك نظرتي
هواي يعجز فكرتك وجمالك يعجز فكرتي
في الصد تزيد في جبرتك...في الحب أزيد في خبرتي
دائما اردد ذكرتك ............هل مره فهت بذكرتى
**********
أنت الذي اتعبتنى.......... وأنت الذي بك راحتي
لو آن هلاكي....ولى دنيت أحيا وتحل بى فرحتي
كم استغثت وكم شكيت من سقمي وإتلاف صحتي
كم رددت آهاتي كم دوى في الأفق صدى صيحتي
****************
سندس وعسجد حلتك....... ولما أنا الهوى حلتي
ماذا جنيت يا معبدي........ماذا جنيت يا قبلتي؟
ما ضر يا محبوبى...... لو تنظر لحالتي بالتي
هي أحسن النظرات.......ثم تريني فيك اهلتى
**********
هلا تركت تصددك..........هلا حببت مودتي
هلا رضيت تمازج .......الحب بيننا لافادتى؟
رفقا بمن يهواك .....يا من أنت صفوة سادتي
رحماك بى ضاق الفضا رحماك طالت وحدتي
***************
جيوش اشتياقي هزمتني......... زادت انتى
لو كنت قربى لأسرها.... اجعل لحاظك سنتي
ياروحى ياراحى.... ويا نورى يا ناري يا جنتي
بهوي الهلاك في هواك.. ليتخذ العوازل سنتي

[الصديق ابراهيم دفع الله]

جوهر صدر المحافل
(( الشاعر صالح عبد السيد " ابو صلاح " ))
(هذه الاغنية من درر الحقيبة ومن اروع الكلمات لان الشاعر ابو صلاح استخدم فيها مفردات رائعة وسلسلة واستخدم فيها من فنون البلاغة الكثير والمثير فكانت واحدة من اعظم اغنيات الحقيبة واكثرها استماعاً )
************
ياجوهر صدر المحافل روحي معاك اتلطفيله
مالدور الفي حليه رافل في حكمك لقلوبنا قافل
كالظبي الفي مقيله غافل تارة يميل والتانية جافل
وجه ينور والبدر آفل فوق للبدر يزيد نفيله
************
ليك جوز عين نعسان وكاحل زي وجدي اللي جسمي ناحل
بحر الشوق ماليه ساحل بنسب نوحي علي البلابل
وانتي القمره بتنسبيله
**************
الغصن البتنى مايل طيره ينوح بي غصنه مايل
أهوى نسيم لي فكري شاتل الأسد الفي القيد يناتل
يتأكد ماليه كاتل غير مكحول ظبي النتيله
*************
المرنوع بي كنفه هادل درعه يميل بي خصره جادل
أنا نايم والليل سادل شرط الحاكم يبقى عادل
مايمنع طيفك يغازل أنا في الحب لي روحي بازل
داخل قلبي ليك منازل يا لايم لاتبقى هازل
هل عاشق يسمع لعادل خلي نصيحتك عني زيله
***************
يوقد شوقي ودمعي هامل جمر الحب لي جسمي شاعل
كيف لا تشعل في مشاعل لو الدهر بي حالي جاهل
في الأنجم أسأل سهيلة
*************
أنا في الريد مالقيت وسائل غير بث النسمات وسايل
أغرب شي وعجبنا سايل حلم الصاحي ودمعه سايل
لو شكيت في أمري سائل البدري كونك مثيله
*********
يوقد شوقي ودمعي هامل جمر الحب لي جسمي شاعل
ضاق بي الكون مع إنه ماهل دمي يخضب للأنامل
هل يرضيك كدا ياجميله
هل يرضيك كدا ياجميله
هل يرضيك كدا ياجميله

[الصديق ابراهيم دفع الله]

ماهو عارف قدمو المفارق
(( الشاعر خليل فرح ))
*************
ماهو عارف قدمه المفارق
يا محط آمالي السلام
***********
في سموم الصيف لاح له بارق
لم يزل يرتاد المشارق
كان مع الأحباب نجمه شارق
ماله والأفلاك في الظلام
**************
يا دهر أهوالك تسارق
منها كم كم شابت مفارق
ما علينا الفات كله فارق
رقنا ولا نعيد الملام
**************
من حطامك أنا غصني وارق
في شن أبقيت للطوارق
غير قليبا في همومه غارق
ولسانا برده الكلام
**************
ويح قلبي الما انفك خافق
فارق ام درمان باكي شافق
يا أم قبايل ما فيك منافق
سقي أرضك صوب الغمام
************
يا بلادي كم فيك حاذق
غير الهك ما أم رازق
من شعاره دخول المأزق
يتفاني وشرفك تمام
****************
مسرح الغزلان في الحدايق
والشوارع الغر والمضايق
قول لي كيف أمسيت دمت رايق
ودام بهاك مشمول بالنظان
***************
مجلس اللذات في النمارق
والترف لا زال وصفه خارق
ضاري حسك فاح جانا مارق
وله قاطعو الريح ما هو لام
***************
في يمين النيل حيث سابق
كنا فوق أعراف السوابق
الضريح الفاح طيبه عابق
السلام يا المهدي الامام
***********
أين مني الودعته شاهق
باكي ناهد لسه مراهق
عيني ما بتشوف الا شاهق
أين وجه البدر التمام
**************
أين مني الفي زهوه باسق
في شبابه نقي من مفاسق
بين ثيابه البيض المناسق
حولك اشبه رتل الحمام
***************
يا بريد الجو فوقي حالق
ميل علي الروح ليها خالق
عدت سالم قول وأنت عالق
مقرن النيلين كيلو كام
**************
الحبايب لفتوا الخلايق
بيني وبينهم قطعوا العلايق
ان دلال ان تيه كله لا يق
نحن ما مجينا الخصام
***********
يا جميل يا نور الشقايق
أملأ كأسك واصبر دقايق
مجلسك مفهوم شوفه رايق
عقده ناقص زول ولا تام
*********
من فتيح للخور للمغالق
من علايل ابروف للمزالق
قدله يا مولاي خافي حالق
بالطريق الشاقه الترام
*********
ما يئسنا الخير عوده سايق
الحي يعود ان أتي دونه عايق
الي يوم اللقا وانت رايق
السلام يا وطني السلام

[الصديق ابراهيم دفع الله]

قائد الأسطول
(( الشاعر سيد عبد العزيز ))
يا قائد الأسطول تخضـع لـك الفرسـان
ياذو الفخار والطول أرحم بنـى الإنسـان
مين لسماك يطول ما بطولـك اللمسـان
معناك شرحـو يطـول والله يـا إنسـان
أصدق كفانا مطول ياذو الحسـن إحسـان
أنا عقلى بيك مختول والناس عقول ولسان
مـا بنكـر المعقـول آمنـت بالأيـمـان
يا الطلسم المصقول بـدل لخوفـى أمـان
بالنور سحرت عقول كانت صميمة زمـان
يا من تحق القول قتل النفـوس حرمـان
وما الجندى والمكتول و طالـب الغفـران
من أيـدو راح منتـول واتوهـد النيـران
فاقد الصواب مبتـول ممـا رأى حيـران
أصبح زهر مشتول وفاح مـلا الجيـران
يا علة المعلول كـم أومـى ليـك بنـان
كم من أسير مغلول مالاقي لحظة حنـان
يرى وعدك المحلول زى حجـة الوسنـان
والكان سكونه تلول مـا ببدلهـم بجنـان
يا حبيبي كون ممهـول وليكـون ماكـان
الفى غد مجهول والماضى إسمـه الكـان
نفديك شباب وكهول ونبقى ليـك أركـان
فى قصـرك المأهـول ونخـدم السكـان
يالفى سماك مفصول تنشاف عيان وبيـان
ما عرفنا ليك وصول وما دنيـت أحيـان
إنت الخطـاك أصـول .. ويعلـم الديـان
مثلت فينا فصول مـا بدرسهـا النسيـان
ناقم على الأيام مع أنـه طبعـى صفـوح
انا والخيال فى جدال وانت بنـداك منفـوح
كل ما النسيم يغشاك زى الحديقـة تفـوح
رايق كحيل نعسان انسان رقيق وجمـوح
ساحر العيون بجمال فى سواك ما مملوح
ان كان تميس بنميس ان كان تموج بنموج
عدل الطبية جعل جور الحبيـب مسمـوح

[الصديق ابراهيم دفع الله]

أنا في التمني
(( الشاعر محمد ود الرضي ))
أنـا فــي التمـنـي ديـمـه هديـلـي سـاجـع
مـا لقيـت لـي مغيـث ولا لقيـت لـي مـراجـع
*************
داير أشوف حبيبي اليوم داك .. شفته رايق ودمعه ناقع
أسـود شعـرو حالـك .. أمـا صـفـاره فـاقـع
تتلاصـف خــدودو .. لا حـجـاب ولا بـراقـع
أشوف لعسـو ونواعسـو .. جـل البـاري صانـع
أشوف في خدو شخصي .. وفي صدري المضـارع
**************
يفـر خيـت بسمـه يشبـه .. برقـا ً ليلـو هاجـع
يرفـع لـي رشاشـو .. يسـبـل نـظـره واقــع
دايـر أشوفـو غافـل .. ودايـر أشوفـو جــاذع
يتغطـى بـي سواعـدو .. ويحنـو كأنـه واجــع
ويلتجـى بـى مرافقـو .. وأطــراف المضـاجـع
وتتلـب فــوق شفاهـهـو .. لـؤلـؤة المـدامـع
يـردد لـي نغيمـا ً .. تشـتـاق لــه المسـامـع
**********
أعاين فيهو وأضحـك .. وأجـري وأجيهـو راجـع
أقيـس بالليـل شعـرو .. ألقـى الفـرق شـاسـع
أقيـس الفـم بودعـة .. الـقـى الــودع واســع
ده مـا بيلقـاهـو زول .. زي الصـيـده نـاجـع

[الصديق ابراهيم دفع الله]

في الضواحي
(( الشاعر خليل فرح ))
في الضواحى وطـرف المدايـن
يلا ننظـر شفـق الصبـاح ...
قوموا خلو الضيق في الجنايـن
شوفوا عز الصيد في العسايـن
يلـه نقنـص نطـرد نعـايـن
النهـار أن حــر الكمـايـن
كلبي جمجـوم أصلـه خايـن
شوفوا كيفـن يبـرأ الملايـن
هب شال وكشـح المـراح ...
للقنيص الخيـل خـف راسـن
نحن ما بنخاف مـن مراسـن
المكارم غرقنا ساسن والمجاهل
مـيـن غيـرنـا سـاســن
ان عطشنا نمـز مـر وآسـن
وأن عشقنا بنعشـق محاسـن
فى المحاسن كفي يومنا راح ...
في الخميلة انجلـت المحاسـن
عيني حايرة ومشي قلبي جاسن
بعض حسنك هي يـا محاسـن
الحرير حيـن قدميـك داسـن
والزهور حين شفتيـك باسـن
والغصون من لدنـك مياسـن
والنسيم فاح بكـر المـلاح ...
يـا الطبيعـه الواديـك ساكـن
ما في مثلك قط فـي الأماكـن
يا جمـال النـال فـي ثراكـن
يـاحـلاة البـرعـن أراكــن
في قفاهن تـور قرنـه ماكـن
لا غشـن لا شافـن مساكـن
في الخزام والشيخ والبـراح ...
شوف صباح الـوادي وجمالـه
وشوف خضاره وصيده ورماله
شوف يمينه وعايـن شمالـه
شوف نسيم الليل صاحي مالـه
شوف فريع الشاو مين أمالـه
القمـر خجـلان مـن كمالـه
والصباح لا بهـل الوشـاح ...
يـا أم لسانـا لسـع معجـن
كلمة كلمـة وحروفـه ضجـن
ديل خدودك غير داعـي وجـن
ديل عيونك من غير سبه لجـن
ديل دموعك من نظـرة شجـن
ده دلال ايـه ده دلال معـجـن
محـن الامـات يــا رداح ...
ماك نسيم الليـل بـي بـرودك
نامت الازهـار فـوق خـدودك
غرد العصفـور فـوق عـودك
النفوس مـا اتعـدت حـدودك
ما عرفنا عـدوك مـن ودودك
بس أنا المقسوم لـي صـدودك
يا حياتي وأملي اللـي راح

[الصديق ابراهيم دفع الله]

مداعب الغصن الرطيب
(( الشاعر سيد عبد العزيز ))
يا مداعب الغصن الرطيب
فى بنانك ازدهت الزهور
زادت جمال ونضار وطيب
****
يالمنظرك للعين يطيب
تبدل الظلمات بنور
وتبدل الأحزان سرور
إن شافك المرضان يطيب
****
تعجبنى والشىء العجيب
هادي وأليف ماك النفور
بى عفتك صنت السفور
والحسن والأصل النجيب
****
انا وانت فى الروض يا حبيب
راق النسيم وحلى للمرور
بقى أحلى من ساعة السرور
وأدق من فهم اللبيب
****
والروضة فى موقع خصيب
حضنوها واتلافوا النهور
ترى فيها انواع الزهور
من كل لون أخدت نصيب
****
يانع ثمارها ونص وطيب
أِبه بربات الخدور
الإنبرجن فى يوم حبور
زادن جمال ونضار وطيب
****
فى الروض غنى العندليب
ورددوا غناه الطيور
ترتيل أناشيد الحبور
وفتيانها يوم عيد الصليب
****
دنت الثريا بقت قريب
بين السلوك فى تانى دور
فى ثانية كم سطعت بدور
وأهلة كان نوعن غريب
****
شىء ينعش الروح فى الأديب
ويحيى روح ميت الشعور
للقاك تنشرح الصدور
ويفرح القلب الكئيب
* * * *

[الصديق ابراهيم دفع الله]

لي زمن بنادي
(( الشاعر عبد الرحمن الريح ))
لي زمن بنادي انا للخديده نادي
ياناس محبوبي ساكت قصد عنادي
*************
مع نزول دموعي اذا اشتعل زنادي
لصدي عن سواه اوجه استنادي
متين يهل هلالي واسمع المنادي
ينادي عن حبيبي يقول ترك عنادي
************
بسامحه لو ازاني ولو خلف معادي
حبيبي لو هجرني بحبه ما بعادي
احب تملي قربه ويحب دوام بعادي
منعني عن وصاله وشمت الاعادي
************
قولي كيف بينجح مع الخدود جهادي
مادام سمر عيونك مضيع اجتهادي
من الحميم شرابي ومن الجحيم مهادي
سهرت والكواكب تعلمت سهادي
*************
جميل وصف جمالك يحير الشوادي
غزال نفرت مني وجعلت قلبي وادي
تجني لو اقبل خدودك النوادي
اذوب من اللطافة ويذوب معاك فؤادي
******
أراك اسرت قلبي وملكته في الايادي
اراك نفور وجافي وبعيد عن اصطيادي
بعيد وصف جمالك ومن الهوى ازديادي
جمال خلاف جمالك دا عندي شي اعتيادي

[الصديق ابراهيم دفع الله]

سألتو عن فؤادي
(( الشاعر محمد علي عبد الله (( الاُمي ))
سألته عن فؤادي
سألته عن فؤادى وعن سبب هيامه
أجابني ما هو عارف
عشقته وجماله نظمته فى فنونى
جفانى صدى عنى تركنى لشجونى
اذا تلاشى صبر وترعرت جنونى
واذا أنبرى فؤادى لعهدى ما بخالف
حبيبى يا مدلل بحق صفا كمالك
حرمتنى وصالك وملت عنى مالك
أنا صريع محاسنك وانا أٍير جمالك
تعال شوف تعال زفيرى والعواطف
يا فرحة الحزانى ويا زينة المواكب
يا ربرب الخميلة ويا زهرة الكواكب
زمانى جار معاك وهاهو لى ناكب
بعدك الصلانى يادرة المعارف
جمالك المكمل لهانى عن سواك
وتيهك او دلالك رمونى فى هواك
حبيبي أنت ومين يكون دواك
أظن عفوك عنى ورضاك لى يوالف
أهوى الذى ضنانى وغزانى بى نباله
ولا سأل فى حالى ولا خطر بباله
يرانى أو أراه وأقيف ذليل قباله
واقوله أنت سيدى وفيم عنى صارف
* * * *

[الصديق ابراهيم دفع الله]

أنا صادق في حبك
(( الشاعر عمر البنا )

أنا صادق في حبك لو قلبي
يتصل بي قلبك .. هذا مقصودي
********
أنا أقصد ودك وأنت تحرمني
النظر في خدك .... لأذاي
ديمة باذل جهدك مع علمك بهواك
منذ أيام مهدك ... انت مريودي
أمتى تنجز وعدك وعني يذهب نحسي
ولي يطلع سعدك ... يا حبيب غثني
ما بطيق نار بعدك وأنت عارفني
ما بعيش من بعدك ... انتهى وجودي
*******
الشباب في عصرك جملة معترفين
لجمالك وحسنك .. يا مهدّل يا مفدّل
يا المهفهف خصرك الكواكب والحور
قاصرين عن قدرك .. كيف أنا هجودي
*******
أمتى يفرج سجنك وأشوف صورتي
في مراية وجنك ... تنجلي عيوني
بي تغزُل حسنك أكوي عزالي
بالتقرب منك وفيك أرى سعودي
******
قال لي لازم .. صبرك من وصالي قريب
الدخول في قبرك من زمن يا عشوق
لي قاهر أمرك والعفاف يمنع قلبي
ليك يتحرك .. والجفا شهودي
******
قلت له بحق .. ربك أسلي كل ...... أهلي
لو حظيت بي قربك حظي لو ... ساعد
ثانية بس أظفر بك بعد ذلك أموت
ما في شك بفخر بك أنت مريودي

[الصديق ابراهيم دفع الله]

عازة فى هواك
خليل فرح
عازة في هواك عازة نحن الجبال
ولليخوض صفاك عازة نحن النبال
عازة ماسليت وطن الجمال
ولاابتغيت بديل غير الكمال
وقلبي لي سواك ماشفته مال
خذيني باليمين انا راقد شمال
عازة ماسليت جنة بلال
وملعب الشباب تحت الظلال
ونحن كالزهور فوق التلال
تشابي للنجوم وانا ضافر الهلال
عازة في الفؤاد سحرك حلال
ونار هواك شفا وتهيك دلال
عذابي في هواك حلو كالزلال
تزيدي كل يوم عظمة وازداد جلال
عازة جسمي صار زي الخلال
وحظي في هواك صابو الكلال
وقلبي لسعه ماعرف الملال
لانه ود قبيل وكريم الخلال
عازة ماشكت مر الحجال
ولا السوار بكي وفي يمنها جال
عازة في الفريق للطيق مجال
قبيلة بت قبيل ملاء الكون رجال
عازة في ربوع ام در شمال
عازة في حذا الخرطوم قبال
عازة من جنان شمبات حبال
وعازة في الفؤاد دوي يشفي الوبال

[الصديق ابراهيم دفع الله]

أسمعنى نشيدك
(( الشاعر / محمد علي عبدالله ))
----------------
أسمعنى نشيدك
ورينى كمان فى الفن تجديدك
يا حمام الدوح
أسالنى أفيدك
عن حالى البى وأحسبنى شهيدك
ولهى ما بفيدك
أبقالى رسول أو خذنى فى أيدك
أترك تهديدك
أسمعنى درر وواظب ترديدك
وين القى نديدك
يا جالى الهم زيد شجوى وأزيدك
عقب تغريدك
يا ساجع الدوح خلينى أريدك
وأًلا ليه بريدك
وألأ بس روحى يا حمام فى وريدك
لا تخش هجيرك
سافر يا حمام مولاك يجيرك
سارع فى سيرك
لو لى جناح أنا كنت وزيرك
رحماك فى صعيدك
أندب حظى وأدنى لى بعيدك
يوم عيدى وعيدك
يوم الأيام لديارى تعيدك *** ***

[الصديق ابراهيم دفع الله]

كل ما أتاملت حسنك
محمد بشير عتيق
----------------
كل ما أتاملت حسنك يا رشيق
القي أية تضاهي أية
كيف تزيد ناري وشقايا
وحبي ليك انا حب مكمل وسامي غاية
الوشاة يا روحي هم اكبر دعاية
دع ملامن وسيب كلامن واستلامن
أوفي قربك وخلي قلبك يكون معاي
يا شموس أفقي وصفايا
يا خلاصة الحسن والغيرك نفايا
أرجوك لا تهمل شقايا
نظرة منك ولو خيال فيها الكفاية
بي ظمائي مع الاماني يقر زماني
يسمو فني وتروي عني لذيذ غنايا
إنت قاضي ولي حكمك سيفه ماضي أباح دمايا
وحبك استعمر حواسي وللفؤاد أعلن حمايا
الف عام في خمسماية
ياخي لو صار أنتهايا برضو بهواك للنهاية
شوقي دايم وقلبي هايم وفي النسايم

[الصديق ابراهيم دفع الله]

هل تدري يا نعسان
محمد بشير عتيق
*****************
هل تدري يا نعسان أنا طرفي ساهر
جسمي إضمحل بغرامك وإنت زاهر
أنا حالي ظاهر عاشق نبيل ياجميل ليك حبي طاهر
وشاعر مجيد لغناك فنان وماهر
بسحر دلالك وكرم خلالك
وعشان جمالك أوهوى القمر والنيل و أهوى الأزاهر
ليل ونهار أنا لي حيك بهاجر
أخذني نورك ياساحر المحاجر
لاأخشى لوم في هواك لاأخشى زاجر
مهما الأقي كم طول فراقي وفرط إشتياقي
حافظ عهودك وحياة خدودك يااللي هاجر
حسنك بديع ياوديع في عصره نادر
حكم صفاك مولاي ذو حكمة قادر
مكتوب هواك لي ضناي يا حبيبي صادر
ماكر شفاي وأراك على طبي قادر
وأنا برضه آمل تعطف تجامل بمس الأنامل
تشفي الجروح والروح ولي لقاى تبادر

[الصديق ابراهيم دفع الله]

أيام صفانا
(( الشاعر /محمد بشير عتيق ))
***********
أذكري ايام صفانا واذكري عهد القاء
والليالي الفي حبور
اذكري ايام صفانا والليالي الفيها متبادلين وفانا
جينا بي كل اقتراب
من حديث يشفي الجراح
بي مغازلة وانشراح
والقمر بي ضياهو آالق والنسيم يهدينا انفاس الزهور
*****************
كنا داخل روضة مافيش حد سوانا
غير ان القمري يهتف بي هوانا
من اهازيج فنه يسمعنا اسطوانة
اما ارواحنا الخفاف
رافلة في اثواب عفاف
زي عرائس يوم زفاف
والنجوم بي عيون تسارق في اشتياق
تنظرنا من خلف الستور
****************
الرياض مبتهجة داخل اقحوانا
والزهور نديانة تستقبل اوانة
زاهية يانعة ورايعة في توب ارجوانا
والنهر لينا اقترب
والطيور تسجع طرب
عاملة موسيقة قرب
انحنا صار مجلسنا عامر في طرب
في قبطة في نشوة وحبور
*************
يا امير الحسن يا سامي المكانة
من عواطفك حبي لو فاقد مكانة
اهدي لي تفاحة بس او برتكانة
فهي غير شك مرضية
بيها اقتبس الضياء
بل اذوق طعم الحياة
انت ملهمني الاغاني
وانت مصدر فني
احساسي وشعوري
* ** * * ** * * ** *

[الصديق ابراهيم دفع الله]

بت ملوك النيل
شعر : سيد عبد العزيز
*************
يا بت ملوك النيل
يا أخت البدور
مين لى علاك ينيل
فى البدو والحضور
الجبرة فيك بتخيل
محمية الحما
الما حام حداه دخيل
ماكان أبوكى بخيل
بت عز الرجال
أهل الدروع والخيل
الهنا... والسرور
يا السامية ست الجيل
طرفك من حياء
فى عصر السفور خجيل
حسنك وضع تسجيل
فى صحف الدهور
يتلوه جيل عن جيل
لى يوم النشور
الهيفا يا الخنتيل
حروف آيات محاسنك
أرتلن ترتيل
يعجبنى فيك تمثيل
أخلاق الملاك
فى سطوة القتيل
الفارس الجسور
غصنك رطيب وعديل
شعرك ليل
جبينك يخجل القنديل
النور عليكى سديل
يا معنى الجمال
الما أتوجد له عديل
فى ناس ولا حور
فقتى الكانوا قبيل
ما خدات فى الجمال
جائزة نوبيل
حيرتى كل نبيل
عيناك سحرهن
يسحر سحر أبابيل
يخترق الصدور
يا صاحبة الأكليل
ما أظن النهار
العين تدور له دليل
محياك نوره جليل
كنت أقول شمس
لو ما الزمان كان ليل
أن عليك نور
لا زلت ليك أميل
يا رمز السعادة
الما أتوجد له زميل
يا آية التكميل
يا مراية الجمال
الفيكى كل جميل
ريحانة العصور

[الصديق ابراهيم دفع الله]

بدور القلعة
(( الشاعر / صالح عبد السيد أبو صلاح ))
*************
العيون النوركن بجهرا
غير جمالكن مين السهرة
يا بدور القلعة وجوهرا
السيوف الحاظك تشهرا
على الفؤاد المن بدري انهرا
اخفي ريدتك مره اظهرا
نار غرامك ربك يقهرا
صيدة غيرك إيه الجسرا
تستلم أفكارنا وتأسرا
حال محاسنك مين الفسرا
ياالثريا الفوق أهل الثرى
عالى صدرك لي خصرك برا
فيه جوز رمان جل البرا
الخطيبة وردك منبرا
الشعور البسطل عنبرا
الرشيم والرشمة الخضرا
زي فريع في موية منضرا
هل حبيبي نسى ام لي طرا
ياأم شلوخا عشرة مسطره
جلسة ياأبو الحاج اتذكرا
ورنة الصفارة إتفكرا
وهبة بمزيكتو حكرا
كم طرب أفكارنا وأسكرا

*** *** *** ***

[الصديق ابراهيم دفع الله]

ياجميل مابصح ليك
(( الشاعر / عبد الرحمن الريح ))
************
أنا بيك حياتى مؤكدة وبلاد حياتي منكده
ياجميل مابصح ليك تعمل كدا
يامن محاسنك بي قلوب العاشقين مستفردة
خليتني أشكو من الغرام وأقول حقائق مفردة
وأقول حبيبي عمل عدوي خلاني للأسى والردى
ماعندي مانع حتى لو ضيعني ساكن الموردة
ياجميل مابصح ليك نعمل كدا
أنا بي محاسنك بفتخر زانت المحاسن سيده
يومي الأشوفك يبقى عيد والدنيا تبقى معيدة
البدر ان شافك يدوب من الأنوار الجيدة
أما الشمس لو شافتك ترجع أسيرة مقيدة
ياجميل مابصح ليك نعمل كدا
أنا طرفي شايفك ياجميل فقت اللجين والعسجدة
ومهما أعاين في الشباب وين زي محاسنك أوجدة
متى روحي من هذا العذاب تشفق عليه وتنجده
ياجميل مابصح ليك نعمل كدا
يا من على حرب العشوق لحظك سيوفه مجندة
قامتك رطيبة كأنها مخلوقة من زهر الندى
مالحكمة في كونك بخيل وأهلك أرابيب الندى
أصلك بتدلل علي والا الحكاية معاندة
ياجميل مابصح ليك نعمل كدا

[الصديق ابراهيم دفع الله]

رائعة الاستاذ/ ابراهيم العبادي
عازه الفراق بي طال
وسال سيل الدمع هطال
**************
طريت برق الفويطر الشال
وساح دمعي البكب وشال
كمل صبري ومنامي انشال
لبس من ناري عمه وشال
**************
أرض آمالي في امحال
ومن الهم بقيت في أوحال
وبعدك عزه ساء الحال
منامي وصبري أضحى محال
***********
حليل الناسا وناسا
طريت أم در حليل ناسا
وكيف أنساها وأتناسا
ومفتون بي ظبي كناسا
********
ولع جوفي جمري الحي
وما بتطفيه آه وأحي
فيا زينة ربوع الحي
لي دياركم يعود الحي

[الصديق ابراهيم دفع الله]

الخوجلاب
( الشاعر صالح عبد السيد أبو صلاح )
************
مـاكنت رايق وساكن في صفاء وتأمين
فـي الـخوجلاب ياقلبي مني شالك مين
ديـل الـبروق الـشالن ام درر ياسمين
مـابين ظـل الايـك ونـفحه الياسمين
أم ديـل شلوخه تلاته ومن تحت وسمين
يـاقلبي بـينه وبـيني اليقسمك قسمين
جـات روايـح الورود مع الزلال والتين
فـوق الـجمال الـفردي اليلة ملتفتين
بس ايه لزوم انوارنا من شموع ورتين
مـادمت انـت وبـدر الـتم زي اختين
بـقي ديـسك اطول منك ولله متقايسين
شـفنا الـضفاير جـرو للقديم كايسين
أنا شوقي دايماً زايد وماشي في تحسين
انـا صـبري قل ويشهد بي ازاي حسين
برزن نهوده وعامن في الهواء مجاهدين
وعـلي هـلاك العاشق ديمه مجتهدين
صاح وهبه فاقد عقله كم جريح وطعين
الـناس جروحن تسعة انا جروح تسعين
عـد الـشوادي الـغنن يالغرام نايحين
عـد القماري القوقن في الفروع مايحين
عـد الـنسايم الـمرن بالمسك فايحين
تـغشاك ياعثمان نعمة وسرور كل حين
** ** ** **

[الصديق ابراهيم دفع الله]

حبيبي جفيت
كلمات / عمر البنا
يا حبيبي جفيت وبي وصالي وودادي نفيت ... مالك
** **
حارق فؤادي ما لقيت وبي نظرة منك ... واكتفيت
مالك يا حبيبي لو كان وفيت وبي طيف خيالك ... واختفيت
يا المن دلالك ما فضيت وتعذيبي في حبك ..... رضيت
سجلت نفسي وليك مضيت ومملوكك أحكم ... ما قضيت
** **
من نار هواك بيك التجيت ومنك التعطف ... ارتجيت
لو في الخيال لي مرة جيت كان ضاع وفي الحال نجيت
** **
يا درتي الليك انتقيت وغيرك بديل انا ما لقيت
بيك كم تعبت وكم شقيت ويا ليلى انا قيس قيس بقيت
** **
فوق الكواكب حق عليت غاب البدر وانت انجليت
مهما عظم خطبي وبليت في حبك اذداد ما سليت
يا البي صدودك لي فنيت وايه النظر لو اغتنيت
انا فيك كم آمال بنيت وهاجرني ما ذنبي الجنيت

[الصديق ابراهيم دفع الله]

زمانك والهوى
الشاعر / علي المساح
**************
زمانك والهوى أعوانك.....احكمي فينا هذا أوانك
حمامة الغصون صداحة فوق أغصانك
ذكرى لي حبيب ياحمامه مولاي صانك
هاجت عبرتي ويا دموعي كيف حبسانك
وين تلقى المنام يا عيوني غاب إنسانك
مدنف ودى بيك لكن فقدت... حنانك
روحي وهيبه ليك هي هدية طوع بنانك
هاروت سحره مأخوذ من سحر عينانك
ظلموك لو يقولوا الدر شبيه أسنانك
في صبحي ومساى نازلات دموع ساحالك
وأنا كايس رضاك ورضاك أظنه محالك
أتعكر صفاي وبياضي أصبح حالك
والحال العلى ياريتو لو يو حالك
حسنك مافى عجمان ولا عربانك
لو هب النسيم الزاكى ميل بانك
أدبك خدرك الضاراك على ما بانك
ما ضر لو أكون أنا من احد حبانك
قلبي أمين هواك يا الجميلة خلالك
يا ذات الجمال فرضا علىّ إجلالك
لو شوفتك مباح دمى العزيز ما غلالك
عدتي وعاد هناى يا البهجة هلّ هلالك

[الصديق ابراهيم دفع الله]

وداعاروضتي الغنا
الشاعر / حميدة ابو عشر
***********
وداعا روضتي الغناء وداعا معبدي القدسي
طويت الماضي في قلبي وعشتُ على صدى الذكرى
وهذا الدمع قد ينبي بظلم المهجة الحيرى
لماذا الهجر يا حبي
لماذا دهرنا ظنا وشبع روحي باليأس
وداعا
نسيت الماضي يا ليلة ماضي الحب والطغري
ليالي مطري الليلة بحلو النجوة والشعر
ليالي حبنا الأولى ليالي حبنا الأول
نسيتي ليلة إذ كنا نفدي النفس بي النفس
وداعا
وظل أردد الشكوى لما لقيت من وجدي
حبيب الروح لا لا أقوى على حمل الهوى وحدي
ولما لم أجد سلوى ولما لم أجد سلوى
كسرت إبريقي وألدنا سكبت على الثرى كأسي
وداعا روضتي الغناء وداعا معبدي القدسي

[الصديق ابراهيم دفع الله]

شاغل فكري حبك
كلمات الشاعر /محمد بشير عتيق .
شاغل فكري حبك والفي قلبي كامن يعلم بيه ربك
يا ذو القدر رفقا بي مهجة محبك
زبد الحسم كسبك
وأنت رشيق مهفهف يانع نامي خصــبك
لكن يـا مدلل تعرف إني حبـــــك
وتعلم نوع ســقامي وليه تحرمي طبك
قال لي إنت أصلك في طرق المهالك داخل كل مسلك
أصلو هواي مسرح مثل فيه فصلك
وأختم دور حياتك زي الكانوا قبلك
قت لو مرامي ولفك يا من عالي صدرك
وخصرك جاذبه خلك
قال لي سيب مجونك وسيب إغراك ووصفك
في الحب أحي ذكرك بعفافك وظرفك
آسر قلبي لطفك ما ضراك مناما لو واليتني عطفك
قال لي إنت جاني وســبب الفتنة طرفك
دوم على نار غرامك لما تلاقي حتفك
قت له فقدت حلمك ما دام لي محارب
ومافي أمل لسلمك
مع كلا .. بحبك وبرضو يكون في علمك
مهما يقضي حكمك .. عين العدل ظلمك
جيلك يفتخربك ليك اسطوع مدرع
مين يتمنى قربك
قصدي أكون محايد وتبعد عني حربك
وبي أسطول عيونك ليَّ توالي ضربك

[الصديق ابراهيم دفع الله]

جاروا اهلك
الشاعر / سيد عبد العزيز
جاروا اهلك وجورهم امر بالبعاد والامر امر
فى ديارهم حجبوا القمر
البديع السحر الفكر بالجمال والحياء انسكر
حسو يرمى الزول فى وكر شوفتوتسكر من دون سكر
للقلوب يا صاحبى احتكر شىء يخلف خالد الذكر
مفخر الاجيال والدهر حسنه معجزة على ما ظهر
فى خدوده الحياء ازدهر والطبيعة تناجى الزهر
تدى منظر جذاب بهر زى نجوم السما فى النهر
نوره للبدرين احتقر البهيج النضر الاغر
المحتشم من الصغر يزدرى البراق بالثغر
منو كل الجيل فى بغر فيه شارد الحسن استقر
من عيونو اين المفر جيدو جيد الظبى النفر
محيو فيه البدر السفر كم بافئدة واعيات ظفر
هو الحاز الحسن الوفر زول يوازن مليون نفر
لو حجبوه بالامر الصدر ما حجبوا دمعى الانحدر
كل شىء ان صفا او كدر من ايادى القضا والقدر
اما دهرى صد اوغدر البعرفو الوفا ما ندر
حبى هاك القول الابر العيان يغنيك عن خبر
كم نظرت فى دهر العبر نظرة اللى للحياة اختبر
الجزع فى الناس والصبر شفتو طوع القدر انجبر

[الصديق ابراهيم دفع الله]

حور الجنان

الشاعر / سيد عبد العزيز
--------------------------------
من حور الجنان أم أنت إنسان الكمال
هل أنت الملاك جيت تورى الناس الجمال
سبحان من أنشاك حسناً فى غاية الكمال
يهواك الجنوب واليك ينقاد الشمال
وما أظن يحصوا حسنك لو يحصوا عدد الرمال
وبايه يقدروك يا ملك ملوك عصر الجمال
سلطان بهجتك محروس بجيوش الجلال
ويغار من صفاء حسنك صفاء ماء الزلال
فى مراية خدودك أِشوف تأكيد سحر الحلال
وأِشوف فى سما حسنك كل يوم يسطع هلال
صفا ماء الجمال فى مجال جمالك راق وجال
زى ماء الحياء فى عيون ربات الحجال
وما فعل السلاح تفعل عيناك النجال
مكسور الطريف كسر قلوب الرجال
يا خلاصة المعاني الصار معناك موضع مثال
فوق المحسنات حايز لطف وكرم خصال
الهة الجمال يعترفوا ليك ماليك مثال
تتمنى البدور تقبيل يداك بامتثال
يا طايل الوريد يا أهيف يا اللى خصمه زال
فيك منظر يحنن وفيك منظر فارس النزال
ليك من الغزالة جبين وقاد وعيون غزال
الحور من مناصبها لى قدرك تكتب نزال
يالغصن الرطيب عاجبنى فيك الإنهداك
اللادن قوامك من ملين وذو اعتدال
جوهر حسنك الصافى وسيرك طاهرات عدال
آيت بينات مافيهن للكافر جدال
شاركت الغمام والموج مناظر وإرتحال
شاركت الظبا فى نفرتن والاكتحال
شاركت القلوب فى موضعهن وعلى كل حال
نفداك بالنفوس وفدا النفوس كان المحال

[الصديق ابراهيم دفع الله]

بقعة أمدرمان
الشاعر / خليل فرح
***********
أذكر بقعة أم درمان
وأنشر في ربوعها أمان
ذكر يا شبابي زمان
دارنا ودار أبونا زمان
فيها رفات جدودنا كمان
ما بنساك خلقه ضمان
جنة وحور حماك أمان
ذكر يا شبابي زمان
بطرا الأسسوك زمان
كانوا يحلحلوا الغرمان
يساهروا يتفقدوا الصرمان
ذكر يا شبابي زمان
في السودان فتيح معروف
ولسه أب عنجه خورو سروف
ود نوباوي زول معروف
باقى وديك مشارع أبروف
ذكر يا شبابي زمان
كانوا جبال تقال ومكان
نزلوا اتربعوا الأركان
خلوا البقعة كل مكان
آهلة وزارة بالسكان
ذكر يا شبابي زمان
ليه يا كعبة العربان
غاضبة وفين عريسك بان
قبال نسأل الركبان
حبك من حسودك بان
ذكر يا شبابي زمان

[الصديق ابراهيم دفع الله]

يوم الزياره
كلمات: عبيد عبد الرحمن
************
أفكاري الحيارى
ضاعت بإختيارا
حبيبي آه أنا قلبي تاه في يوم الزياره
الدنيا وعمارا
و الجنة و نعيما بزهورا و ثمارا
الناصع بياضا و الخاطف صفارها و الفاتح حمارها
فصود في خدود يضون و خدود بدون أماره
يرسلوا نور ملون أحمر أخضر أصفر
فاتن يا سماره
إلتفت و أهداني نظرة بزري بالزهر و إزدهارا
مثلت فيها الوداعه و خفة الروح و المهاره
دا الجذب قلبي بي فنه
نظرة مني ونظرة منه و إرتفعت الحراره
و إلتهبت العواطف و أصل النار شراره
شال منام عيني و توارى
سابني وحدي أشدو وجدي
و أرسل الآهات مرارا
ماهو عارف البي لأنه لسه ننّو
حوله ناس بالعيد يهنوا
و ناس متابعنه ويغنو
و أنا روحي ليه تتوق
داعيها حادي الشوق
هايمه في ليلها ونهارها
و إنت يا الناعسات عيونك
الله لعيوني السهارى

[الصديق ابراهيم دفع الله]

هجد الانام
الشاعر/ عمر البنا
*************
هجد الانام وانا وحدي مساهر والنحول علي جسمي ياحبايبي ظاهر
اه اسبابي الحب الطاهر
****
اسباب سقامي وبكاء طرفي الساهر**لااذاي بعادك مضي سيفه وشاهر
مره اندب حظي ومره اهتف اظاهر**اشكو دهري واناجي النجم الزاهر
***********
انتع عادل وظالم انت ناهي وامر** يتمني البدر ليك يبقي مسامر
كونك دواما في نور اليه مخامر** امتيازك عنه انت هادل وضامر
*********
بالبان والاس مال قوامك ظافر** علي صدرك قنبل كم اسلم كافر
العيون والضمره والوريد الوافر** من محاسنك عارن الغزال النافر
********
كل ما اكتم حبك دمعي بيه يجاهر** مابفيدني طبيب مهما يكون ماهر
طبي مابين كوثر فاك وبين جواهر** سنك اللماعه والخديد الزاهر
*********
عار صفاه التبري من صفاك الناضر ** ياخلاصة الحسن في العصر الحاضر
الملوك ليك تخضع لنداك تقول حاضر** تخشي سطوة حسنك وفيك يتلو محاضر
**********
بي وصالك جاحد وبي جفاك مبادر** كاليزيد في الجبره وفي بخاله مادر
بجمالك وحسنك يالفي عصرك نادر** لي ارحم حلمك راعي لاتكون غادر

[الصديق ابراهيم دفع الله]

دمعة الشوق
الشاعر / مصطفى بطران
****************
حكم حبي أرعى نجم الليل يادمعة الشوق كبي
نسمة الأسحار هبي أنا مساهر ونومي متخبي
انتحل جسمي والمحال طبي
مصدرو الزهرة الفي نواحي سهيل
انشغال فكري وانفصال لبي
وشحوب لوني كله من حبي
انسلب عقلي وانتزع لبي
أما آمالي طوحت بالميل
إن قوامه يميل للغصون يزري
وازدهار محيو للبدور يخفي
في جبينه تشوف حكمة الرب
زي سواد حظي جوز نواعسه كحيل

يابديع الزي وأزهر اللون
ياخفيف الروح ياسما الصون
خلقك مولاك زينة للكون
حبب الأرواح في هواك ياجميل
عهدي بيك ياجميل شيمتك الحلم
أرى هجرك لي رد ظلمي
إنت عارف نوع حبي ليك سلمي
وشوقي مهما ازداد برضو شايفه قليل
يادمعة الشوق كبي
حكم حبي أرعى نجم الليل
يادمعة الشوق كبي